Samuel Mardochée Pompée: Se te rèv mwen pou’m kite Ayiti epi jwe pwofesyonèl

Touswit aprè li te fin siyen premye kontra pwofesyonèl li, ansyen kapitèn seleksyon U20 an, Samuel Mardochée Pompée akòde haititempo.com yon entèvyou manch long kote li pale de nouvo klèb li a ak sou adaptasyon li nan peyi Pòtigal. Ansyen lateral dwat ekip Valencia a te reponn kesyon nou sou pwoblèm ki lakoz jwè ayisyen yo gen difikilte pou travèse dirèkteman an Ewòp pou al jwe foutbòl wo nivo. Pou fini, li manifeste volonte’l pou li defann drapo peyi a ak seleksyon nasyonal la.

Nou envite’w swiv entèvyou sa a nan tout entegralite li ak anpil atansyon.

HT: Samuel, ou apèn siyen premye kontra entènasyonal ou, ki sa sa reprezante pou ou?

SMP: Bonjou Haiti-Tempo! Se yon gran plezi pou mwen pou nou pale avèk mwen paske gen anpil fanatik foutbòl ki panse mwen pa’t jwe ankò. Donk premye kontra sa vle di yon pakèt bagay pou mwen paske se te rèv mwen pou’m kite Ayiti epi jwe pwofesyonèl. Menm lè ke se pa gran choz sou plan ekonomik men mwen panse avèk travay, disiplin, anpil sakrifis, volonté, anbisyon epi fokis mwen kwè tout lòt bagay pozitif yo pral vini pou mwen.

HT: Èske ou ka pale nou de nouvo ekip ou a ?

SMP: Nouvo ekip mwen an rele Grupo Desportivo Gafanha, se yon klèb ki nan D3 Nasyonal Pòtigal, se yon ekip ki gen yon strikti pwofesyonèl e ki ka ede’m al nan pi wo nivo a ki se objektif premyè mwen, se fason sa ki pral ede’m rejwenn seleksyon an ankò.

HT: Ki jan ou te arive dekwoche kontra sa a ak Grupo Desportivo Gafanha?

SMP: Bon, mwen nan peyi Pòtigal depi 5 Septanm ki sot pase a nan staj avèk Anadia FC men negosyasyon ant ajan mwen avèk ekip sa a pa’t fin tonbe dakò donk mwen te oblije deplase pou mwen te rejwenn Gafanha pou yon yon staj. Se gras avèk travay mwen, sakrifis epi detèminasyon mwen rive satisfè tout staf lan epi yo dakò siyen mwen.

HT: Ki lè w’ap kòmanse jwe ak nouvo ekip ou a?

SMP: Mwen ta sipoze kòmanse jwe avèk nouvo ekip mwen Gafanha ofisyèlman a pati de kòmansman mwa fevriye a lè tout papye mwen fin kòrèk; sa vle di lè tou 2 federasyon yo fin finalize tout bagay paske ou konnen se yon entènasyonal ayisyen ke mwen ye sa pral pran kèk jou pou demach yo fini.

HT: Kòman adaptasyon an ye pou ou nan peyi Pòtigal?

SMP: Avan tou map voye yon konsèy bay tout jwè ayisyen ki vle vin pwofesyonèl demen, fòk yo al lekòl ou byen aprann pale kèk lang etranje. Pou’m reponn ou, manje yo nòmal, mwen renmen yo; mwen adapte’m vit paske mwen gen abitid pati souvan, tanperati a konn deranje’m kèk fwa men mwen reziye’m paske mwen gen yon rèv, mwen konn sa mwen bezwen nan vi’m. Mwen gen tout yon peyi ki kwè nan mwen kòm talan ki ka itil seleksyon nasyonal lan. San dout mwen oblije fè anpil sakrifis pou’m pot yon rezilta pozitif. Epi pou lang nan depi Ayiti mwen te degaje’m trè byen nan anglè, mwen souvan jwenn staf mwen yo ki pale anglè ak jwè yo tou epi ajan mwen an pale anglè byen. Pou lang Potigè a, mwen kòmanse konprann anpil bagay ladan epi pafwa mwen eseye pale avèk jwè yo tou. Yo ede’m pwogrese anpil nan lang lan.

HT: Gen 2 lòt jwè ayisyen k’ap evolye Pòtigal , èske’w an kontak ak yo?

SMP: Wi, mwen pale avèk Alex pi souvan ke Christiano François, 2 mesye sa yo se Porto yap viv men mwen menm m’ap viv nan yon vil ki rele Luso.

HT: Ou lòtbò a depi septanm 2015, ki konparezon ou ka fè ak nivo lig la ak D1 Ayiti a?

SMP: [Ri] Pou’m diw fòk dirijan nou k’ap fè foutbòl yo repanse sou jan yap fè’l an Ayiti, Foutbòl D1 nou an pa gen pyès rapò avèk D3 nan okenn peyi an Ewòp, se bagay pwofesyonèl nèt epi an tèm de strikti yo se nètman diferan, stad nòmal epi gen gwo nivo football tou.

HT: E nan nivo talan?

SMP: Mwen di’w sa deja, tout ekip yo gen yon pakèt bon talan, se la tout ekip wo nivo vin pran jwè; se pou mwen fè’w santi kijan gen nivo nan D3 nan tout peyi Ewop yo sitou Pòtigal ou ka pran ekzanp Alex Christian ki t’ap jwe nan Villa Real (D3) aprè Boavista (D1) siyen li apre 6 mwa de konpetisyon li jwe. Pou’m konkli, gen anpil talan

HT: Selon ou menm, pouki nou pa gen plis jwè ki sot Ayiti al an Ewòp tankou’w?

SMP: Pou’m kòmanse jwè nou yo gen talan se vre men yo dezòd anpil nan tout sans, yo manke objektif avèk anbisyon epi yo trè dezòd taktikman sou teren, se sèl problèm mwen te genyen lè’m te fèk rive Pòtigal men kounye a mwen se yon jwè ki grandi sou plan taktik, se kounye a mwen rekonèt ke mwen konn jwe paske an Ewòp depi’w pa ka reponn taktikman y’ap voye’w tounen! Dezyèm pwoblèm, jwè nou yo pa gen ajan kap travay avèk yo kontrèman ak mwen ki gen youn nan pi bon ajan yo nan Pòtigal li se ansyen jwè Benfica epi Birmingham City F.C., kounye a mwen pataje menm ajan avèk Jean Sony Alcénat (Tiga).

HT: Èske ajan sa a pa entèrese pou’l ta travay ak lòt Ayisyen?

SMP: Mwen ka di’w wi paske Tiga avèk mwen pa fè li wont, li rete kounya pou’m kontinye pwouve misye ke mwen se yon pwofesyonèl mantalman e ke mwen gen anpil anbisyon pou rive pi lwen. Konsa mwen ka pwopoze li kèk bon jèn jwè mwen konnen ki gen karaktè menm jan avek mwen men pou le moman se mwen ki pou travay epi fè wout la pou yo.

HT: Ou pale de jwè Ayisyen yo ki dezòd, ki sa ki baz pwoblèm sa a selon ou menm?

MSP: Lè mwen di’w dezòd la gen ladan yo ki chaje talan, yo te ka rive lwen menm jan avek yon pakèt jwè ayisyen ki rive nan jwèt la jodi a, men yo dòmi ta y’al nan pwogram, yo bwè alkòl epi plen fi tou (ri), epi gen nan yo ki kite yon viza ameriken gaspiye karyè foutbol yo e si yo te ret fokis yo te ka benefisye plis ke sa.

HT: Ayiti kalifye pou Kopa Amerika 2016 la, èske’w pare pou defann koulè peyi a si tout fwa Patrice Neveu konvoke’w sitou aprè nouvo kontra sa a?

MSP: Avan tou fòk mwen felisite tout ekip lan an jeneral ki fè yon gwo travay pou rann tout yon nasyon fyè de drapo nou an, epi avèk FHF tou ki fè yon gwo travay pou te chache yon staf ki plis profesyonèl e ki gen eksperyans pou vin dirije grenadye yo. Pou reponn kesyon’w lan rejwe pou seleksyon nasyonal la se pral yon onè pou mwen donk map travay anpil e fè anpil sakrifis pou mwen jwenn chans fè pati gwoup definitif lan e si tout fwa mwen pa ta prezan map kontinye goumen pou mwen ale pi lwen pou mwen mete talan mw o sevis de peyi’m ke mwen renmen anpil la ki se Ayiti. Kopa Amerika sa se tout mond la ki pral fikse sou li, ma’p fè tout sa mwen kapab pou mwen jwe byen kote’m ye a pou mwen la aprè poum jwenn yon lòt pi gwo kontra nan premye divizyon an Ewòp.

HT: Haititempo.com, remesye’w epi nou swete’w bòn chans. Yon dènye mo pou’n tèmine!

MSP: Dènye mo se ou menm k’ap jwenn li avan pou gwo travay w’ap fè nan milye foutbòl lokal la ki toujou kenbe tout pèp la, tout fanatik foutbòl de ki jan tout grenadye yo ap jwe, donk mil mèsi pou entèvyou sa e mwen kontan anpil. M’ap remèsye tout moun ki te kwè nan mwen ni sa’k pat kwè ke mwen t’ap reyisi staj lan, ma’p di yo kontinye swiv foutbòl lokal la ankouraje jwè yo, ale nan match yo an foul konsa nap vin gen yon spò ki pi bèl pou yon lòt Ayiti e yon lòt imaj sou foutbòl lokal la. Mèsi Tempo.

—–

Entèvyou reyalize pa Benson Petit-Clair pou haititempo.com