Foot-Finans: Absans seleksyon an nan Gold Cup 2017 la ap koute FHF anpil lajan!

Chak 2 lane, 12 peyi nan CONCACAF la rasanble nan peyi USA pou patisipe nan Gold Cup la ki se pi gwo tounwa foutbòl ki fet nan rejyon an; konpetisyon sa a ki domine pa Mexico ak USA bay 12 patisipan yo yon chans pou yo ekspoze talan yo epi rantre lajan nan kès yo.

Si Gold Cup ane sa a ap spesyal pou ti zile tankou Curaçao ak Guyane ki pral patisipe pou yon prremye fwa, kalifikasyon tounwa a kite yon gou amè nan bouch chak ayisyen pou fason nou elimine devan Guyane ki bat Grenadye yo 5-2 nan stad la, epi finalman devan Nicaragua ki bat Ayiti 3-0 apre nou te fin bat yo 3-1 lakay nou. Eliminasyon sa lakoz seleksyon senyò a ki te deja elimine nan Koup Karayib la 2017 ak eliminatwa pou mondyal 2018 la, pral pase 2 lane san patisipe nan yon gwo konpetisyon. Kidonk absans seleksyon an nan Gold Cup la ap gen gwo konsekans ekonomik sou foutbòl ayisyen an ki te deja gen gwo problèm vizibilite ak lajan.

CONCACAF te depanse 25 milyon dola US pou’l òganize Gold Cup 2015 lan men tounwa a te rapòte 91 milyon dola US , sa ki egal ak 66 milyon dola benefis. 91 milyon dola sa a se total lajan ke konpetisyon an kolekte nan kontra pou televize match yo, nan tikè ki vann nan chak match, nan machandiz òganizate yo vann e lajan sponsò tounwa a te bay pou yo ka jwenn vizibilite ak ekskizivite.

Tablo rekonpans finansye Gold Cup 2015 lan:

Chanpyon: 1 milyon dola US

Vis Chanpyon: 500 mil dola US

3e plas :  200 mil dola US

4e plas: 150 mil dola US

¼ de finalis: 125 mil dola US

Rès patisipan yo: 100 mil dola US

Nan edisyon 2015 lan Ayiti te elimine nan ¼ de final devan Jamayik, donk FHF te benefisye 125 mil dola US.  Sepandan Gold Cup 2015 la te pote plis avantaj toujou paske rezilta nou nan tounwa a te pèmèt Ayiti kalifye pou Copa America Centenario, yon konpetisyon ki te ofri nou plis vizibilite epi plis retonbe ekonomik. Pou Gold Cup 2017 la, CONCACAF pa ko anonse prim l’ap bay patisipan yo men genyen yon gwo posibilite pou yo ofri yo plis lajan ane sa a.

Patisipasyon Ayiti nan Gold Cup 2017 la t’ap bay FHF opòtinite pou li jwenn  sponsò ak patne ki kapab ede foutbòl ayisyen an avanse. Answit, sa tap fasilite leta santral la ki te prezan nan stad la nan match baraj kont Nicaragua dekese plis lajan pou seleksyon nasyonal la. Yon lòt kote, FHF ak Saeta t’ap vann plis mayo seleksyon an.

Absans nou nan Gold Cup la ak lot konpetisyon yo pral lakoz Ayiti pèdi plas nan klasman FIFA a, sa ki pral san dout diminye posibilite pou nou jwe match amikal ak gwo peyi k’ap prepare konpetisyon. An 2013 Ayiti te jwe 2 gwo match amikal kont Itali ak Espay, 2 match sa yo te fèt nan kad preparasyon pou Gold Cup 2013 la pandan Espay ak Itali t’ap prepare Koup Konfederasyon,  yon lot tounwa Gold Cup ta ka fe Ayiti patasipe ladan si toutfwa nou ta arive chanypon. Si Donald Guerrier pa’t skore devan Espay, li te ka pa’t janm siyen kontra an Ewòp. Tout sa se benefis endirèk Gold Cup la.

Pou Grenadye yo, Gold Cup la t’ap yon bèl opòtinite pou yo vann talan yo menm jan Duckens Nazon te itilize tounwa sa a pou’l te eklate apre’l fin fe youn nan pi bèl gòl nan konpetisyon an ki t’a pral ede Ayiti kalifye pou ¼ de final. An plis, jwè yo tap touche pou  patisipasyon yo nan Gold Cup la, epi yon bèl pefomans, sitou devan USA, te ka ede yo dekwoche pi gwo kontra.

Absans Ayiti nan Gold Cup 2017 la se yon gwo defisi pou ni FHF, ni Grenadye yo, ni medya ayisyen yo epi tout ayisyen ki renmen seleksyon nasyonal la. Foutbòl la se yon biznis ki chaje ak lajan men avèk dirijan ki san vizyon, san lidèchip, san konpetans melanje ak jwè ki pa kapab bay rezilta sou teren, se tande n’ap tande lòt peyi ap fe milyon nan  jwe foutbòl.

 

Benson Petit-Clair, Ekonomis

À lire aussi:

Comments

comments