MLS: New England Revolution anrejistre twazyèm match nil yo pou sezon 2017 la

Ekri pa Benson Petit-Clair

Devan 16,591 spektatè, New England Revolution ki t’ap resevwa DC United, samdi swa nan Gillette Stadium anrejistre twazyèm match nil yo pou sezon an kek jou aprè ansyen ekip Zachary Heriveau a te fin fè yon match nil (0-0) ak San Jose Earthquakes.

Revolution louvri skò a nan 5e minit rankont lan sou yon kout tèt de Lee Nguyen ki pwofite enskri 4e gòl li pandan sezon an apre li fin yon sant de kamarad li Kei Kamara.

Yon ti moman aprè, DC United ta pral jwenn egalizasyon an nan men Jared Jeffrey ki enskri premye gol li pou sezon an. Vizitè yo agrave skò a e pran kontwòl match la nan 28e minit la, swa 2 minit apre premye gòl yo a, gras ak Sebastien Le Toux ki te jwenn yon pas nan men Lloyd Sam. Premye mitan match ta pral fini 2-1 an favè DC United.

Menm jan sa te fèt nan premye mitan rankont lan, New England kòmanse dezyèm mitan match la ak yon gòl 3 minit apre 2 ekip yo soti nan vestyè. Revolution egalize sou yon otogòl de Sean Franklin ki tap eseye devye yon kout tèt de Antonio Delamea apre yon kònè ekip lokal la te benefisye. Tou 2 ekip yo te jwenn anpil aksyon ki te menasan men yo pat arive make yon gol pou depataje skò match la ki fini 2-2.

Pwochen match New England pwograme pou samdi 29 avril lakay Seattle Sounders tandiske DC United ap an deplasman kay Atlanta United, youn nan nouvo ekip lig MLS la, dimanch pwochen.

Share

Comments

comments