Dimanch sa, pak Saint-Victor ap resevwa final chanpyona espesyal premye divizyon nasyonal la. Pou match sa, kote Real Hope FA ap twoke kòn li ak Ouanaminthe, Rapha Intervil, atakan Rhinocéros yo, pa kache objektif li ki se ranpòte twofe a.
Aprè plizyè lane kanpe, chanpyona nasyonal la te rekòmanse ane sa nan yon fòma espesyal, Rapha Intervil bay opinyon l sou sa : “M kapab di m santi m fyè de sa, paske se yon chanpyona ki fè anviwon 3 pral nan 4 lane kanpe. Men kounya l rebalanse, m santi m fyè pou sa, paske m ap jwe chanpyona lakay mwen, e m te reve jwe chanpyona lakay mwen tou. Bon kounya m kapab di se yon chanpyona ki pral fè tout ti jèn kontan ak tout foutbolè ki an Ayiti yo tou. Se yon plezi pou nou, pou nou wè chanpyona lakay nou rebalanse, pou n te ka pran plezi ladan l”.
Atakan Real Hope FA a te make de gòl nan de match ekip li a jwe nan faz Playoffs yo, sa ki ede klèb la atenn final la, kote li pral twoke kòn ak Ouanaminthe. Pèfòmans sa yo sisite anpil fyète lakay li : “M kapab di m vrèman santi m fyè paske tout sa m te reve yo e tout sa m te pwomèt yo, m wè yo kòmanse ap fèt. Se yon glwa pou mwen, m santi m fyè de tèt mwen e m santi m fyè de koyekipye m yo tou ki pèmèt mwen rive la, paske se premye fwa m ap jwe chanpyona nasyonal premye divizyon lakay mwen, e m te reve sa tou”.
Pou final la, kote Rhinocéros yo pral afwonfe Capitaines de la Frontière yo, Rapha Intervil rekonèt tach la pap fasil, men li pa kache objektif li ki se genyen twofe sa: “Bò kote pa m, m vle atenn objektif mwen ki se chanpyon chanpyona nasyonal la. Nou pral jwe avèk Ouanaminthe ki se yon ekip ki ba nou tikè ale retou epi li chanpyon sou nou tou nan yon ti tounwa ki te fèt. M kapab di se pi gwo lènmi nou nan nò a paske li fè yon bagay lòt ekip yo pa t janm panse yo ka fè. Se yon final ki p ap fasil pou Ouanaminthe, e m kapab di ni pou nou non plis. Nou pral bat pou nou genyen l sou Ouanaminthe paske chanpyona nasyonal ret chanpyona nasyonal. Aprèsa, n ap prepare n pou sa, n ap travay pou sa, nou tout la met tèt nou ansanm avèk staf teknik la pou n al ranpòte chanpyona nasyonal premye divizyon an dimanch si Dye vle. E mwen menm bò kote pa m tou, m pwomèt fanatik yo sou menm lanse m kanpe a, y ap jwenn menm rezilta a pou final la”.
Nimewo 17 Real Hope FA a motive anpil pou final la, sitou aprè plizyè lane kote chanpyona a te kanpe. Randevou kase dimanch aprèmidi pou nou konnen ki ekip k ap ranpòte koup la.
Home
Store
Contact