Nan yon entèvyou manch long li akòde haititempo.com, Jonel Désiré fè limyè sou rezon ki koz li pa janm tounen nan peyi la Frans pou siyen ansanm ak Guingamp jan sa te prevwa. Nan entevyou sa a, jèn atakan Ayisyen an fe anpil gwo revelasyon sitou konsènan avni li nan AS Mirebalais.
Nou envite’w swiv entèvyou a ak anpil atansyon:
HT: Jonel, poukisa nou pa souvan remake’w nan match AS Mirebalais yo pandan sezon an?
JD: Bon avan mwen kòmanse m’ap salye popilasyon an, mwen la mwen anfòm selman mwen gen kèk ti problèm pèsonèl k’ap pase mwen anndan ekip la ki koz pafwa mwen jwe pafwa m pa jwe men apresa mwen la trankil.
HT: Eske se problèm sante?
JD: Se pa pwoblèm sante, se pa blesi, se jis problèm pèsonèl mwen ki donk mwen deside pa kontinye avek ASM sezon k’ap vini an mwen pral fè eksperyans mwen yon lòt kote konsa mwen panse nap gen poun wè Jonel pi wo toujou jodi ya ka se dènye match mwen fas Aigle Noir. M’ap mande Bondye poul banm fòs ak Kouraj poum fè yon bon dènye match sou koulè AS Mirebalais.
HT: Ou di li posib pouw jwe dènye match ou jodi a ak ASM, eske sa vle di w’ap tounen an Frans nan Guingamp kote’w te deja fè yon staj?
JD: Tout moun konnen depi yon bagay ap fèt epi pa gen seryozite ladan’l tout bagay ap tonbe. Nan moman pou mwen te siyen an viza mwen te fini mwen te oblije antre Haïti pou mwen te vini renouvle’l. Guingamp te vin wè twòp tan pase li pa vin pa’t intéressé ankò e ajan mwen an dim sa. M pap ba nou manti m te pran yon gwo kou. Bon pou kounye a mwen gentan bliye sa. Lè’ m di denye match la mwen pa vle di m’ap tounen an France m’ap la Haïti nan ekip ki prè a akeyi mwen an.
HT: Donk aprè sezon sa a w’ap lib pou siyen ak nenpot ekip?
JD: Wi, aprè match jodi a la m’ap lib pou nepot ekip la.
HT: Eske sa vle di pa gen posibilite pou ou ta tounen nan Guingamp?
JD: Pa gen posibilite men ajan mwen an gentan tcheke lòt staj pou mwen pou mas 2016.
HT: Nou konnen ou te an kontak ak Cruzeiro tou nan peyi Brezil, èske dosye sa a tonbe tou?
JD: Bon sa gen lontan depi ke Cruzeiro t’ap met presyon pou mwen te ale mwen pat jwenn chans jwenn yo. M panse si ajan mwen an eseye fè kontak yo se staj li pral ye se pap antre dirèk.
HT: Èske w panse AS Mirebalais se rezon ki fè w pa gentan nan yon ekip etranje?
JD: AS Mirebalais gen yon sèl moun apre prezidan an se sèl prezidan an ki kapab regle tout bagay nan afè staj mwen. Epi ou konn prezidan an nan afè politik sa koz tou tout bagay pa fèt nan tan pou yo ta fèt la. M panse rive mwen nan yon lòt ekip ap plis fasilite bagay yo pou mwen.
HT: Eske ou pa sou kontra ak ASM?
JD: Non m pa sou kontra non. Mwen antre nan ASM a 15 zan e Fanmi mwen pat siyen yon kontra tou epi ASM pagen yon jwè ki siyen kontra.
HT: Sa vle di nenpot jwè ka kite nenpòt moman?
JD: Mwen pa’p pale pou lòt jwè ki kapab kite nenpòt moman men mwen konn nenpòt moman mwen vle kite an m kapab.
HT: Donk ou deside kite aprè match jodi a?
JD: Wi, aprè match jodi a mwen met yon fen avek ASM.
HT: Ou pa panse se yon desizyon emosyonèl?
JD: Non, desizyon m pran an m trè sévère ak sa. Pa gen anyen ki pou fè m tounen sou li.
HT: Nan moman pou w te tounen nan Guingamp an, ou te jwe ak U23 e ou te menm voyaje ak Seleksyon nasyonal la Grenade, eskew pa panse desizyon sa yo tou pat anfavè ou?
JD: Non, mwen te menm sipoze gentan tounen avan m pati ak seleksyon an mwen t’ap fin siyen epi m poum te tounen vin jwe, se konsa poul te ye epi menm la toujou, tout bagay tonbe.
HT: Poun fini èske w gen yon mesaj ou ta renmen voye bay dirijan foutbòl yo an Ayiti?
JD: Mesaj pou dirijan yo se ke Jonel lib aprè jodi a. Yo ka kontakte mwen.
HT: Haititempo.com remèsye’w, nou swetew bòn chans.
JD: Mwen menm tou m remesye Haïtitempo.
—–
Entèvyou reyalize pa Benson Petit-Clair pou haititempo.com
Home
Store
Contact