Foot – D1 – Playoffs : Jamesley Daniel voye mesaj bay fanatik 2 ekip finalis yo !

Ekri pa Douby Jean

Nou tout konnen ke demen dimanch lan ekip Arcahaie FC a ak ekip Violette la pral kwaze bab pou bab nan pak Saint Yves nan kad match retou final pleyòf chanpyona nasyonal premye divizyon an. Jwè ekip AS Capoise la, Jamesley Daniel nan yon piblikasyon ke li fè sou paj Facebook li mande fanatik de ekip yo pou yo fè Fair-play pase avan tout bagay.

Jou ki te mekredi 6 desanb lan, Violette te gen chans resevwa Arcahaie FC nan sant FIFA GOAL la. Yon match ki pat twò byen dewoule akoz batay ki te genyen ant jwè 2 ekip yo aprè egalizasyon ekip ki te an deplasman an. Men, tout bagay ta pral rantre nan lòd paske aprè 90 minit yo, se Vye Tig yo ki te genyen match la.

Kòm nou tout konnen, ke se sou de match ke final la jwe. Ebyen, ekip Violette AC genyen pou li rann li nan vil Akayè pou li al jwe dezyèm match la. Nan sans sa, Jamesley Daniel raple tout moun ke final la dwe makònen bèl foutbòl ak kè kontan : “Bonswa fanatik football. Final toujou vle di yon pakèt bagay nan kèlkeswa sa ke li ye. Mwen espere ke fanatik Violette ak fanatik Arcahaie pa kite sa k te pase mèkredi a nan tèt nou, pou nou kite jwè yo ba nou yon bèl foutbòl san vyolans ak anpil kè kontan.” Li ale pi lwen pou li di : ” Ann pa kite pasyon fè nou toujou ap fè foutbòl la ak vyolans. Si VAC chanpyon mwen espere ke moun Arcahaie bat bravo, si Arcahaie FC chanpyon, pou fanatik Violette AC bat bravo pou AFC.” Li te fini mesaj li a ak pawòl sa yo : “Ann fè foutbòl la nan lanmou ak respè. Se pa tire wòch, se pa bat jwè, k ap pote solisyon an. Nou dwe mete tèt nou ansanm pou n chanje foutbòl peyi a. Konsa, mwen panse ke Haiti ap gen foutbòl ke n ap chache a. Mwen kwè nan chak grenn fanatik Arcahaie, mwen kwè nan chak grenn fanatik Violette. Mwen konnen ke dimanche nou pral bay yon egzanp, pou nou moutre ke nou kòmanse ak yon lòt foutbòl ak yon lòt espri nan lane 2021 an.”