Haititempo.com ap prezante nou yon entèvyou ak Alex Chritian Junior ki te okipe pòs lateral goch pandan viktwa istowik Grenadye yo sou Trinidad ki pèmèt Ayiti kalifye pou Kopa Amerika 2016 la. Nan entèvyou sa a, Alex pale ak nou sou viktwa grenadye yo, sou Kim Jaggy, sou karyè li nan klèb li ak sou divès lòt pwen ankò.
HT. Alex, ou te jwe tout match la vandredi pase kont Trinidad, Ayiti dekwoche yon plas pou edisyon espesyal Kopa Amerika 2016 la, ki sa kalifikasyon an reprezante pou ou?
AC: Sa reprezante yon pakèt bagay pou mwen. Se youn nan rèv ke mwen realize pami sam gen pou’m realize yo. Pou kounye a, mwen rete kalifye pou mondyal, chanpyon nan Gold Cup ak chanpyon nan Koup Karayib. Tout sa se rèv mwen ak seleksyon an.
HT: Eske’ w toujou met nan tèt ou ke wap reyalize tout rèv sa yo?
AC: Wi. Men li pa fasil konsa tou li pa difisil. Avèk travay epi disiplin y’ap fèt. Epi tou mwen kwè nan jwè ki la yo.
HT: Selon ou menm ki sa ki ba nou kalifikasyon sa a pou Copa a?
AC: Motivasyon bò kote antrenè a [Patrice Neveu] ak jwè yo. Nou pa’t gen lòt chemen apre match sa a pou nou te pase.
HT: koman w te santi’w touswit aprè match la kote seleksyon an te jwenn biyè kalifikasyon an?
AC: La jwa ak kè kontan paske mwen te wèm pami moun ki make istwa sa a pou peyi’m.
HT: Ou te jwe tout match la, kòman ou evalye pèfòmans ou te bay la nan lateral goch seleksyon an?
AC: Pou fanatik yo se te byen men pou mwen se pa’t mal paske mwen ka fè plis toujou. Sa mande konfyans paske mwen respekte Kim jaggy anpil.
HT: Pandan ou mansyone Jaggy, CONCACAF chwazi’l kòm youn nan meyè defansè zòn nan pou ane 2015 la, ou gen yon kòmantè sou sa?
AC: Se byen, li merite’l. Paske pou mwen se li ak Mechak Ki meyè jwè ayisyen pou ane 2015 lan. Bravo ankò pou Jaggy.
HT: A 33 zan Jaggy pral ale, èske ou santi ou pare pou’w ranplase’l san pwoblèm nan ban defans seleksyon an?
AC: Wi, si non mwen pa tap la a.
HT: Pou Kopa Amerika a ki sa ou panse ki dwe fèt pou’n ka byen reprezante peyi a devan tout gwo peyi sa yo?
AC: N’ap bezwen pou pi piti 3 semèn preparasyon. Depi tout jwè disponib m panse n’ap fè rezilta. Si preparasyon an ka 4 a 5 semèn l’ap pi bon.
HT: Pou fini, kòman sa ye pou ou nan nivo klèb ou nan peyi Pòtigal?
AC: Pa mal, men ajan mwen ap chache yon lòt klèb pou mwen pou’m ka gen plis tan de je. Li poko konfime.
HT: Alex, yon dènye mo pou fanatik yo!
AC: Toujou rete konsa ak seleksyon an paske nou gen anpil bagay n’ap ba yo kòm kado toujou. Mwen renmen nou anpil, mèsi pou sipò yo.
HT: Haititempo.com remèsye’w.
AC: Mèsi Tempo!
—-
Reyalize pa Benson Petit-Clair pou haititempo.com
Home
Store
Contact