27 Jiyè pase, KONKAKAF anonse yon nouvo fòma pou eliminatwa mondyal Kata 2022. Kòm sa te prevwa, pi gro chabrak ki responsab foutbòl nan rejyon an fè tiraj osò pou premye faz eliminatwa mondyal la k’ap demare nan mwa oktòb ane sa a. Haïti-Tempo pote pou nou tout presizyon konsènan nouvo fòma sa a ki pral detèmine ki peyi k’ap patisipe nan pwochen mondyal FIFA a k’ap fèt nan peyi Kata apati novanm 2022.
Eliminatwa a genyen 3 faz e premye faz la ap fèt avèk peyi ki klase de 6zyèm a 35kyèm pozisyon nan zòn KONKAKAF la nan klasman FIFA ki te soti nan mwa jiyè 2020. Peyi sa yo regwoupe an 6 gwoup de 5 ekip. Chak ekip pral jwe 4 match: 2 match a lakay yo, 2 match an deyò. Ekip ki fini an premye pozisyon nan chak gwoup ap avanse, rès yo ap elimine. Match sa yo ap kòmanse jwe apati de 7 oktòb 2020 e dènye match yo pwograme pou 17 novanm 2020.
Answit, dezyèm tou a pral jwe avèk 6 peyi ki te fini nan premye pozisyon nan chak gwoup nan premye tou la.
Nan faz sa a chak ekip ap jwe 2 match avèk yon advèsè: youn lakay li, youn deyò. Chak Peyi ki genyen sou ansam 2 match yo ap avanse, rès yo ap elimine. Men ki jan match yo pral repati nan 2e faz la:
Premye nan Gwoup A ap troke kòn ak Premye nan gwoup F
Premye nan gwoup B ap jwe ak premye nan gwoup E
Premye nan gwoup C ap tann premye nan gwoup D
Dezyèm faz la ap kòmanse nan dat 22 mas 2021 e li ap fini nan dat 30 mas 2021.
Twazyèm e dènye faz la pral fèt avèk 8 peyi pami yo 3 peyi ki pase nan premye faz la ansanm avèk 5 peyi ki te pi byen plase nan Klasman FIFA a, 5 peyi sa yo pa jwe ni premye ni dezyèm tou, daprè nouvo fòma a. N’ap raple 5 peyi sa yo se: Meksik, Etazini, Kosta Rika, Ondiras ak Jamayik. Nan dènye faz la, tout 8 peyi yo pral reyini nan yon sèl gwoup kote chak peyi ap troke kòn lòt ni lakay li ni deyò. Lè tout match fin jwe, 3 peyi ki pi byen pozisyone yo ap kalifye pou mondyal la epi 4e nan pral jwe baraj kont yon peyi k ap soti nan yon lòt konfederasyon.
Nap raple twazyèm faz la ap kòmanse an oktòb 2021 e lap fini an mas 2022.
Grenadye alaso.
Home
Store
Contact