Analiz : Kèk rezon ki ka esplike eliminasyon seleksyon nasyonal la

Ak twazyèm defèt li nan twa match, seleksyon asisyen an sòti tèt bese nan nevyèm edisyon mondyal feminen sa a k ap dewoule nan peyi Lostrali ak Nouvèl-Zeland. Gen anpil desepsyon, men si nou gade pi prè, n ap wè se yon eliminasyon ki lojik, plizyè rezon pwouve sa.

Yon atak inefikas

Malgre plizyè chout ki kadre, Grenadye yo pa rive fè gòl nan okenn nan twa match yo dispite yo. Poutan fas ak Langletè, Lachin ak Dànmak, medam yo te jwenn anpil okazyon pou yo make. Inefikasite nan dènye mèt yo se youn nan prensipal rezon eliminasyon Ayiti, paske pyès ekip pa janm rive lwen san li pa fè filè advès yo tranble. Borgella, Batcheba, Melchie, Nérilia ak Roseline pat gen ase lisidite pou transfòme atak yo an gòl.

Yon sistèm twò defansif

Sou papye, seleksyon nasyonal la ajanse nan yon 4-2-3-1 (4-4-2 nan twazyèm match la) ak Corventina k ap jwe nan do atakan pwent lan. Men nan diferan rankont yo, gen pratikman sèt jwè ki plis defann. N ap pale de gadyen an, kat defansè yo epi de milye defansif yo. Menmsi premye vokasyon yo se sa, yo te dwe pote plis solisyon pou seleksyon an lè ekip la ap atake. De lateral yo ak Sherly Jeudy te dwe plis prezan nan mwatye teren ekip advès la, sa ki pa fèt. Kidonk lè kat jwè ofansif yo ap atake epi defans lòt ekip la degaje balon an, nan majorite ka yo se yon kont-atak Ayiti sibi. Sa ki vle di sistèm sa a ki twò pridan lakoz jwèz nou yo mal negosye dezyèm balon yo.

Mete sou li, nan fizyonomi tout match yo, 11 titilè yo bay lenpresyon yo pa vle pran inisyativ jwèt la alòske gen moun ki teknik sou teren an. Nan fòse ekip la rete tann yo mache sou li, Nicolas Delépine chwazi yon estrateji ki pa pote bon rezilta.

Yon ban ki prèske pa jwe

Yon seleksyon se 23 moun ki konpoze l, men nan match Ayiti yo pifò jwè ki sou ban yo pa jwe ase. Nan yon konpetisyon kote anchènman match yo fatige pwotagonis yo, frechè fizik se yon zam anpil antrenè itilize lè yo fè jwè ki te sou ban yo foule pelouz la byen bonè. Si nou wete kèk ka blesi, ban an prèske pa patisipe nan rankont yo. Kiki Joseph, Danielle Étienne ak Darlina Joseph te ka pote efikasite ak vitès pou ekip la si yo te jwe plis.

Yon gwoup ki manke eksperyans

Depi 2018, aprè mondyal U20 an, medam yo kontinye grandi ansanm. Koyezyon ki gen nan gwoup la ede yo rache kalifikasyon yo pou mondyal feminen señor la fas Chili. Men kont pi bon nasyon foutbòl nan mond lan, tout ti detay konte. Malerezman Grenadyè nou yo pa rive fè bon rezilta paske yo manke eksperyans nan konpetisyon entènasyonal wo nivo sa yo. Gen gòl nou pat dwe pran, gen aksyon kote nou te dwe fè filè yo tranble. Byen souvan se yon ti detay ki fè diferans lan, ak plis eksperyans nou t ap rive jere sitiyasyon sa yo pi byen.

Boutofen kanpay mondyal 2023 a fini sou yon nòt negatif pou 11 nasyonal la, men eksperyans lan ap itil pou echeyans k ap vini yo. Objektif la senp : Ayiti dwe la nan mondyal 2027 la. Pa gen kanpe.