Haiti-Tempo rankontre ak Bruny Pierre Richard ki se ansyen kapitèn Grenadye yo yon moman avan Ayiti jwe premye match li nan Gold Cup 2015 lan. Bruny, youn nan jwè ki jwe plis match pou seleksyon nasyonal la, pataje ak nou opinyon li sou gwoup la e profite pote kèk konsèy pou Grenadye yo.
HT – Bruny, Ki konsèy ou kapab bay ak tout jwè seleksyon an ki pral reprezante Ayiti nan Gold Cup la?
BPR– Konsèy mwen pou seleksyon nasyonal la se plis pou jwè ki pa konn Panama tankou Jeff ki jèn m swete yo aplike, men mwen vle bay kèlke konsèy ak sa ki konnen Panama yo tou tankou Jean Jacques ak Aveska. Sa mwen vle di yo se pa pèdi premye match la e rete solidè ak tout ekip la konnen se yon peyi n’ap defann, konnen nou menm Ayisyen nou renmen foutbòl paske 95% pèp la se Foutbòl ki pasyon yo.
HT- Kisa ou panse de gwoup Ayiti a ki gen Panama, Etazini ak Ondiras?
BPR- Mwen pa pè pou gwoup Ayiti a paske chak ekip vin defann koulè peyi yo, yo gen moun k’ap jwe deyò nou gen moun kap jwe deyò tou. Se yon sòt de motivasyon pou chak advèsè koman nou pral jwe kont li. Se kisa federasyon peyi a ofri jwè yo tou parapò ak gwoup ke yo ye a, Kosta Rika te fè valè li nan mondyal la malgre yo te peyi ki pi pòv nan gwoup yo te ye a.
HT- Kisa ou panse de absans jwè lokal yo nan seleksyon sa a antan ke ansyen kapitèn seleksyon an e yon ansyen jwè lokal?
BPR- Pou mwen se yon katastròf pou seleksyon nasyonal ap fèt pa gen 2 jwè lokal ladan’ l, mwen pa konn sou kisa yo baze men yo souvan di ke jwè lokal yo manke manje se kritè sa yo toujou bay ki pa vrè ditou.
HT- Ou te jwe ak kèk kad nan seleksyon sa a tankou Tiga ak Jean Jacques e ou toujou pale ak yo. Ki kalite ou apresye kay jwè sa yo?
BPR- Tiga se yon jwè ki gen tout kapasite li yo nan nivo taktik, teknik epi fizik. Mwen pale de Jean Jacques se paske li gen plis eksperyans se yon bon jwè menm jan ak anpil jwè Foutbòl.
HT- Yon dènye mo pou Grenadye nou yo!
BPR- Anpil bòn chans , peyi a sou do yo, mouye ble ak wouj lan pou de bon, fòk yo pase premye tou an. Grenadye Alaso!.
(Alix Seme pou haititempo.com)
Home
Store
Contact