Merck’n Sley Suprême Jean-Pierre
Seleksyon gason pi piti pase 20 lane Ayiti a ap prepare l pou patisipe nan chanpyona Concacaf ki fèt pou kategori sa a. Aprè viktwa yo nan match amikal kamikal kont Querétaro FC 2-1 yè samdi an, Angelo Jean-Baptiste te eksprime li devan mikwo FHF Média.
Antrenè a kwè match sa a te enteresan anpil, epi li rive montre yo anpil bagay : “Nou gen kapasite pou nou jwe byen” daprè sa li di. Men Angelo Jean-Baptiste vle rete tèt frèt, li fè konnen y ap rete nan imilite, pou yo kontinye travay paske gen anpil aspè pou yo amelyore.
Pami kote ekip li a dwe pwogrese, Angelo presize : “Fòk nou (ekip li a) pi agresif devan gòl la, pou nou kapab make plis gòl”. Men yon lòt bò li felisite jwè li yo li di ki aplike “kòrèkteman sa li te mande yo pou yo fè a”.
Antrenè a ki ap fè wout ak seleksyon sa a, deklare ekip U-23 Querétaro FC sa a se meyè opozisyon yo jwenn. “Yo te gen 6 jwè premyè divizyon pami yo, yo te ba nou yon opozisyon fewòs, nou soufri, yo poze nou kesyon, nou reponn kesyon”, se sa li eksplike.
Angelo Jean-Baptiste prezante advèsè yo a tankou yon ekip ki trè agresif, trè ofansif, men li fè konnen ekip ayisyèn lan trè ofansif tou, yon kalite li ilistre ak fraz sa a “Meyè defans nou se atak”. Li te pwofite mete aksan sou travay kèk jwè tankou Bryan Destin, Seth Powder, Nelson Pierre, Guesly Alexandre ak All Branly.
Teknisyen an ki gen 25 jwè nan men l, ap gen pou l chwazi 20 ladan yo paske daprè sa li di, Ricardo Wagner ki pa prezan, ap rejwenn yo 21 jiyè. Li fè konnen lis la deja pare a 100%. Li anonse yo pral konsantre sou sa yo travay yo, epi al chache yon maksimòm nan men chak jwè yo.
Menm jan li te deja di l aprè kalifikasyon pou dènye faz la, seleksyonè ayisyen an montre li gen konfyans nan ekip li a, li deklare “[…]nou gen espwa n ap mete yon souri nan vizaj pèp ayisyen an”.
Delegasyon an ap kite Querétaro nan dat 19 jiyè, pou yo rejwenn kan baz yo nan vil Irapuato, kote y ap gen pou afwonte ekip Meksik la nan dat 21 jiyè pou premye match yo nan konpetisyon an.
Home
Store
Contact