Foot- D1: 10 bon rezon ki fè playoffs seri ouvèti sa espesyal !

Ekri pa Gary Eliézer

Faz ki pi enpòtan nan seri ouvèti chanpyona nasyonal la rive e Arcahaie, Baltimore, Violette, Triomphe, AS Capoise ak Racing Club Haïtien pral foure tèt yo nan batay sòti mèkredi sa pou rive nan fen mwa desanm sila nan lide pou yo ka rive pran koup la. Ant baraj yo, jiska nou bout nan final yo san bliye demi final yo, gen plizyè bagay ki ta sipoze atire nou nan faz dechoukay sa, ann gade ansanm 10 bon rezon ki rann playoffs sa espesyal.

Paske te gen 2 lanne depi pat genyen l

Peyi lòk mete sou volonte FHF pou te kanpe li yon premye bò, plis kowonavris yon lòt bò, sezon 2019 ak 2020 pat rive nan bout yo avèk à chak fwa 4 ou 5 jounen sèlman ki te gentan jwe. Pou sezon sa, playoffs yo retounen e li ap jwe nan 3 depatman: Lwès, Latibonit ak Nò.

Yon playoffs ouvèti nan fen ane

Tankou jan anpil obsèvatè tap mande sa depi 20 lanne, resi gen yon sezon chanpyona nasyonal ki jwe sou yon kalandriye nòmal tankou sa fèt prèske tout kote serye, sòti nan mwa sektanm pou al bout nan mwa me, sa vin fè tout bagay vire sezon sa. Nan mwa desanm sa kote souvan nou konn nan faz fèmen ebyen se faz ouvéti kap jwe, yon bagay ki rive pou premye fwa.

Yon playoffs san Real Hope pou premye fwa depi 4 lanne

Depi lè Real Hope sòt nan 2e divizyon pou li te tonbe nan premye divizyon nan lanne 2016, koze ki rele playoffs la se pa yon bagay ekip sa te janm te negosye. Li te rate sèlman seri ouvèti lanne 2016 la men aprè sa, kèlkeswa seri ouvèti oubyen fèmen, pi jèn klèb vil Okap la te toujou la, e nan bagay sa li te rive chanpyon 1 fwa, fè yon final epi jwe demi final yon fwa tou. Men pou seri ouvèti sa, ASC di otan e dènye match lavi ou lanmò nan dènye jounen an li te mete ekip Kowsky Sainvil ap antrene a deyò sou yon gòl Jamesley Daniel nan fen match.

Yon playoffs avèk Violette e Racing Club Haïtien nan menm tan

Se pa yon jwèt, malgre Racing ak Violette se 2 pi gro klèb peyi à, yo tou 2 pat janm jwe yon playoffs ansanm, m pa bezwen di w pou youn kont lòt. Wi, sa pat janm te konn rive avan depi lè Federasyon an vini ak koze sa nan sezon 2015-2016. Vye Tig la te patisipe yon fwa, se te nan seri fèmen 2015-16, epi Racing Club Haïtien, 2 fwa (seri ouvèti 2015-16 ak 2017), men pou sezon sa yo resi pral jwe l ansanm.

Triomphe pral jwe playoffs pou premye fwa

Li kreye sipriz la pandan seri ouvèti sa lè li fini pami 6 pi bon ekip yo, Triomphe ki moute nan D1 an 2018 pou yon 4e fwa nan listwa li aprè 1998, 2002 e 2011, ap kontinye fè gro bout tonton ekip ki gen non gen dout, dayè se sèl klèb ki genyen tout match li jwe lakay li sezon sa (8/8). Li rive kalifye pou premye fwa pou playoffs yo, yon bagay ki pral atire atansyon tout fanatik pou yo wè kòman sa pral pase.

Nerlin Saint-Vil, 2e pi bon bitè faz sa pap la

Li prèske enposib pou yon faz playoffs ap fèt pou pa jwenn non Steevenson Guillaume ak Nerlin Saint-Vil pami moun ki fè pou piti 1 gòl, e 2 jwè sa yo se vrèmanvre 2 pi bon bitè playoffs yo avèk 8 epi 6 gòl. Si pi bon an ap la avèk Violette ane sa petèt pou kontinye antre pi fon nan listwa, dezyèm nan pap la pou kontinye swiv ti Barezi. Nerlin pap la pou yon fwa e se prèske se yon evenman.

Paske nou ka jwenn derby national la nan final

Menm si Racing Club Haïtien poko asire pou jwe match playoffs sa yo pou rezon kòb, sa ki deja espesyal, si tout bagay ta antre nan lòd, Racing ak Violette pa ta sipoze kwaze si se pa nan final petèt se ka moman pou nou jwenn yon final antre yo 2 a. Kisa fanatik foutbòl te ka espere de plis ?

Match yo ap fèt nan kèk tèren espesyal

Aprè pak Sen Yves, pak Sen Victor e pak Levelt, tout rès match yo pral fèt nan tèren ki pa abitye resevwa match deja. Tankou Racing Club Haïtien ki ap oblije jwe nan sant Dadadou, e Violette nan Sun Auto oubyen Ranch paske yap pase men nan stad Sylvio Cator men tou nan pak Mercinus Deslouches ki vin fè 3 tèren ki pat abitye konn gen match nan playoffs yo.

4 jèn antrenè a lonè

Si pa bò kote jwè yo se anpil ti jèn ki pral sou tèren tankou Anderson Nalien ki pral jwe tout chans li pou eseye retire Angelot Exilus anlè nan klasman pi bon bitè a, menm jan pou Roberto Louima, Steevenson Guillaume, elatriye. Pou antrenè yo se pap trò diferan menm si n’ap gen 2 ansyen: Sonche Pierre (Racing Club Haïtien), Jean Hubert Anglade (Triomphe) aprè sa, se ti 4 jèn menm si anpil ladan yo fè non yo deja, David Thelemaque, Gabriel Michel Ti Gana, Rony Attimy ou Itala e dènye à ki se Jocelyn Petit-Do ki san eksperyans men te vin kenbe plas John Sévère ke komite ASC a te separe l de li.

Yon playoffs san Dadou Jean-Bart pa prezidan

Se petèt sa moun te ka plis pa panse ki te ka rive, poutan se byen vre, Dadou Jean-Bart, prezidan federasyon foutbòl la depi 20 lanne, pou yon fwa pap la pou playoffs ke li menm te vin avèk li. Sanksyone pou tout tan paske yo jwenn li koupab pou zak kadejak sou timoun nan ranch lan, doktè a ki nan 73 zan oblije kite FHF an repo.