Opinyon : Malgre foutbòl ayisyen an ap trennen, li rive fè bèl rezilta

Merck’n Sley Suprême Jean-Pierre

Nan yon match kote li pase pifò tan an ap defann, ekip Violette la pèdi 0-2 se vre fas ak Austin FC yèswa men li kalifye pou Kadefinal Lig Chanpyon Concacaf yo. Depi 2009 se premye fwa yon ekip Karayib la elimine yon ekip nan MLS la.

Pa gen okenn foto, okenn resanblans posib ant rezilta foutbolè ayisyen yo ak sitiyasyon sosyopolitik peyi a. Ayiti kalifye pou koupdimonn fanm, Violette AC kalifye pou kadefinal Lig Chanpyon Concacaf, pandan foutbòl lakay nou kanpe depi plis pase 2 lane.

An règ lojik, pou w fè bon rezilta nan espò, ou dwe genyen talan pou sa, men sitou yon bon doz preparasyon fizik ak mantal. An Ayiti, malerezman, nou pa souvan genyen dezyèm lan. San konte lòt pwoblèm tankou difikilte pou jwenn viza, ki frape ni seleksyon ni klèb nou yo.

Dènye gwo rezilta foutbòl ayisyen yo pote mak ekslpwa epi yo toujou difisil pou eksplike. Rezon an senp, estrikti yo pa anplas pou sa. Chak nouvo konpetisyon, se eksperimatasyon ki règ la.

Li vin prèske enposib pou w jije rezilta yo lè premye kondisyon yo pa etabli. Lè se lòt jwè yon ekip foutbòl ap rele mande sekou. Malerezman nou sanble poko ap sispann plenyen pou efò ki pa fèt ase pou spò lokal la an jeneral.

Si Violette kalifye, se pa paske tout règ lojik yo respekte. Ant yon match ale ak yon match retou, yon ekip pèdi yon gwo pati nan kad li yo akoz plizyè pwoblèm, gadyen prensipal li absan nan dènye moman… Kalifikasyon sa antre tou dwat nan lejann !