Haititempo.com te gen chans rankontre ak Valendi Odélus, youn nan gadyen seleksyon nasyonal la, ki pale ak nou de viktwa Grenadye yo sou Trinidad, de pèfòmans Steward Céus pandan match la, ak sou Kopa Amerika 2016 la. Valendi te pwofite voye kèk mesaj pou fanatik yo. Nou envite’w swiv entèvyou a nan tout entegralite li.
HT: Valendi, seleksyon nasyonal la kalifye pou Kopa Amerika 2016 la, ki jan ou te viv gwo explwa sa a nan peyi Panama?
VO: Se te yon trè bèl eksperyans. Se te avèk anpil kontantman lè’m wè nou te skore devan Trinidad.
HT: Pèfòmans Steward Céus nan match la te etone anpil moun, èske sa te yon sipriz pou ou?
VO: Non se pa’t yon sipriz akoz mwen rekonèt li kòm yon gran gadyen ki gen anpil eksperyans. Mwen konnen li gen anpil kapasite, depi nan antrenman li te pwouve li ta’p fè yon gwo match.
HT: E pou ou koman sa te ye nan antrenman?
VO: Se te byen paske mwen te jwenn moun ki ta’p travay tou epi ki te mete’m nan plis anbyans poum fe plis efò.
HT: Ki jan w te reyaji lè ou aprann se Céus ki ta’p demare match la?
VO: Mwen te rete nan fason nòmal mwen.
HT: Anpil moun pa’t kwè nan ekip la paske Placide ak divès lot jwè pat la, kòman w konprann sa?
VO: Placide epi lòt jwè ki pa’t la yo enpòtan anpil nan ekip lan men sa ka rive gen jwè ki blese epi gen anpil bagay ki ka koz yo pa la. Nan foutbòl anpil fwa fanatik toujou plis kwè nan moun ki toujou jwe. Fanatik Ayisyen bliye si yon seleksyon se tout meyè jwè yon peyi. Nenpòt moun ka ranplase yon moun ki absan. Yon fwa ke yo konvoke yon jwè nan seleksyon nasyonal la se paske li gen kapasite pou sa. Ma’p pwofite mande tout fanatik yo pou yo fè jwè yo konvoke yo konfyans.
HT: Kopa Amerika se nan kelke mwa ankò, ki saw swete ki dwe fèt avan konpetisyon an pou Ayiti ka byen reprezante nan tounwa a?
VO: Yon bon preparasyon epi tout rès bagay yo ap vini.
HT: Kalifye pou yon tounwa ki pral gen Messi, Neymar, Suarez, James Rodriguez ak anpil lòt gwo jwè, ki sa sa reprezante pou yon jèn tankou’w?
VO: Sa reprezante anpil bagay pou mwen e sa ap fèm fè anpil efò pou’m ka pami 23 jwè ki pral reprezante peyi a. Jwe en fas Neymar ak Messi se pa yon mens afè.
HT: Ki opinion w sou travay nouvo staf la fè nan seleksyon an?
VO: Se trè byen. N’ap travay pou’n gen yon pi bèl seleksyon.
HT: Èske depi apre Pèfòmans ou ak seleksyon U-23 a pa ko gen yon ekip etranje ki kontakte’w?
VO: Mwen pa okouran de sa, mwen pa konnen si sa fèt a dirijan ekip mwen.
HT: Yon dènye mo pou’n tèmine!
VO: Ma’p mande tout fanatik mwen Kontinye sipòte’m, kritike’m lè’m fè sak pa bon. Se nou ki pou ede’m avanse.
HT: haititempo.com remèsye’w.
VO: Se mwen ki ta dwe remèsye’w!
—
Reyalize pa Benson Petit-Clair pou haititempo.com
Home
Store
Contact