Ayiti devwale lis ofisyèl 20 jwèz pou champyona CONCACAF feminen 2014 la

Ekri pa Benson Petit-Clair

Antrenè seleksyon  feminen Ayiti a Shek Borkowski devwale lis 20 jwèz li retni pou patisipe nan champyona CONCACAF fanm yo k’ap gen pou fèt soti 15 pou rive 26 oktòb nan 4 vil nan peyi Etazini.

Ayiti ap demare tounwa a fas a Guatemala nan vil Kansas City, USA, nan dat 15 oktòb k’ap vini la a, answit medam Ayisyèn yo pral jwe Trinidad le 17 nan vil Chicago avan yo jwe kont USA jou kap 20 oktòb la nan vil Washington DC pou klotire faz poul yo.

Nan tounwa sa a,  k’ap gen patisipasyon 8 peyi ki divize an 2 gwoup, 2 premye ekip nan chak gwoup yo ap kalifye pou faz semi final konpetisyon an. 2 peyi ki kalifye pou final yo ak ekip ki ranpòte match twazyèm plas la ap kalifye dirèkteman pou Mondyal 2015 feminen an k’ap òganize nan peyi Kanada. Peyi ki fini an katriyèm pozisyon an ap gen pou jwe 2 match baraj kont Ekwatè, ki fini nan twazyèm pozisyon nan Amerik di Sid, nan optik pou dekwoche dènye biyè pou mondyal medam yo.

Men lis Ayiti a an detay:

GK: Geralda Saintilus, Cynthia Chery
DF: Natacha Cajuste, Kencia Marseille, Shanna Hudson, Yvrose Gervil, Roselord Borgella, Clorene Rateau, Schmid Charles
MF: Dieunise Jean Baptiste, Manoucheka Pierre-Louis, Lindsay Zullo, Wisline Dolce, Woodlyne Robuste, Sindy Jeune
FW: Generve Charles, Kimberly Boulos, Kensie Bobo, Marie Yves Dina Jean-Pierre, Samantha Brand