Ayiti vs Antigua: Analiz apre match

Nou fè yon match nil men se tankou se pèdi nou te pèdi. Rezilta 2-2 kont Antigua a vrèman lamantab sitou apre nou tap mennen 2-0 sou yon ekip ke nou te parèt pi siperyè pase’ l e nou te rate yon katafal gol nan premye mitan an.

Nou rate yon gwo okazyon paske nou demare konpetisyon an kont ekip ki swadizan pi fèb nan gwoup la. Malgre difikilte yo, nou te dwe genyen match sa a san pale anpil e avanse sou Matinik avèk plis konfidans.

3 pwen an t’ap mete nou an konfyans, e nou tap pibyen pare pou Matinik sitou nou tap gen yon bel chans gade yo san fristrasyon pandan y’ap jwe aswè a kont Jamayik.

Match nil sa a bese moral nou, e li moute moral Antigua. Sa pral rann Antigua fè plis toujou kont Matinik e Jamayik. Kanta nou, rezilta match sa a plis anvi mete nou deyo nan konpetisyon an ke l ede nou.

Ekip la pat vrèman prepare pou konpetisyon an, nou pa ka pral jwe yon konpetisyon konsa epi pou’n pa fè menm yon grenn match amikal. Menm ti seyans antrenman an pa’t sifi paske jwè nou yo (sitou sa k sot an Ewop yoy) rive Jamayik tou bouke. Menm si mesye yo te nan konpetisyon ak ekip yo, te dwe gen aranjman ki fèt pou yo ta vini pi bonè toujou.

Sony Norde gen plis ke 3 zan depi l pa jwe pou Ayiti, men sa pa’t anpeche’l titilè nan yon match enpotan konsa. E ironikman, Sony te jwè ki rate plis gol aswè a.

Eske staf teknik la kreye yon tan pou sispèvize jwè sa yo nan chanpyona y’ap evolye yo?

Pouki coach la pat chanje system 4-3-3 a touswit apre premye mitan an?

Gen anpil lot bagay nou te ka di, men nou kanpe la pou aswè a nan komantè yo ak kesyon pou n ta poze.