Ansyen kapitèn seleksyon nasyonal la, Parnel Guerrier ki gen 6 mwa depi li pap jwe foutbòl ak Victory a koz pwoblèm group 5 ki an fas federasyon an, kounye a nan peyi Venezyela kote li pral pran fòmasyon epi tou profite ap antrene ak yon klèb lòt bò a ‘’Policia Lara FC’’ li bay konsèy tou ak Victory epi jèn jwè kap jwe yo. An nou li ansanm chita pale ke nou te fè avèk li.
HT : kòman ou ye Parnel? piblik la ta vle konnen kisa w ap regle pou kounye a ?
PG : Mwen anfòm, mwen pa Ayiti mwen venezyela pou kounye a.
HT: Kidonk ou kite Victory FC?
PG: Mwen al regle lòt bagay, paske mwen pap regle anyen nan foutbòl lokal la.
HT: Poukisa ou pa kontinye ak Victory?
PG: Sa mwen al regle a pi enpòtan ke Victory nan moman an.
HT: Se nan yon lòt klèb ou al jwe oubyen ou bay vag ak foutbòl?
PG: Mwen pa bay foutbòl vag, Mwen al lekòl pou mwen met kèk bagay nan tèt mwen.
HT: Pa gen klèb venezyela ki entèrese pou ta genyen w?
PG : Mwen ap antrene ak youn, n’ap gade sa nou ka fè pou nou al pi devan
HT : Policia Lara FC se non klèb ou ap antrene ak li a, li nan 2zyèm divizyon, ou entèrese jwe pou klèb sa?
PG : wi
HT : Sa vle di ou sou wout kite Victory?
PG : Mwen vle klè avèk ou, Victory pa yon ekip mwen ap janmen dekonekte ak li, se paske lavi a oblije mwen nan pozisyon mwen ye la ki fè mwen la. Mwen panse foutbòl sa tou (venezyela) se yon vrè vi profesyonèl tou.
HT : Madanm Parnel avèk li Venezyela?
PG : Se vre ke mwen marye mwen poko gen pitit, madanm mwen poko avèk mwen, men mwen ap fè sa mwen konnen pou li ka vin jwenn mwen pi vit ke posib.
HT : Ou pa entèrese pou ou ta vin yon antrenè foutbòl yon jou ? swa Victory oubyen seleksyon nasyonal la?
PG : Se rezon sa ki fè mwen deyò la, mwen pral pran yon fòmasyon 2 lane pou sa.
HT : Men pou moman sa, kisa ou regle ak Victory ?
PG : Mwen pa la, mwen pa konnen kisa yo regle.
HT : Si ou tap konseye dirijan yo (Victory) pou yo remanye ekip la pou yo vin profesyonèl se kisa li tap ye?
PG : Premye bagay, fòk yo asepte fòme yon nouvèl jenerasyon foutbòl an menm tan ki al lekòl tou, epi asepte pote foutbòl la bay antrepriz ki ka mete lajan ladan li, twazyèm bagay, voye fòme jèn ki konn jwe pou yo vin antrenè oubyen dirijan.
HT : Eske ou pa regrèt seleksyon an?
PG : Pou laj mwen gen la mwen paka regrèt seleksyon an, mwen regrèt pito ke yon jwè ka fè tout siksè nan klèb ouswa ak seleksyon epi aprè sa pou li ap enkyete li de kòman li pral viv demen. Yon jwè ki chwazi jwe foutbòl Ayiti, se yon nèg ki deside fè yon pòsyon moun plezi pandan li menm li pa konn kòman avni li ap ye demen.
HT : Ou gen yon ide de foutbolè Ayisyen ki ap jwe lòt bò dlo yo, kiyès ki enpresyone ou?
PG : Mwen kapab toujou pale de Jean Sony ” Tiga” Alcenat ak Donald Geurrier epi Jeff Louis paske mwen gen plis respè pou wout yo fè avan menm yo rive nan gwo nivo profesyonèl la, mwen pa twò gen gwo ide de lòt yo apa de lè yo nan seleksyon.
HT : Ki jwè ayisyen ki ap jwe kounye a ou wè ki sanble ak ou nan teknik epi nan disiplin?
PG : M. Duverger Mackendy
HT : Yon dènye mo Parnel !
PG : Mwen di tout staff Haiti-Tempo a mèsi pou posibilte li toujou ban mwen pou mwen eksprime mwen epi mwen vle raple jèn jwè foutbòl nan peyi a ke yo fè yon bon chwa ki se jwe foutbòl, men li enpòtan tou pou yo pran lekòl serye paske karyè ou ka toujou kontinye kòm spòtif si ou gen bèt sou ou.
(Pawòl sa yo se Alix Seme ki te resevwa yo pou haititempo.com)
Home
Store
Contact
Konpliman Panel Guerrier. Mwen swete ou reyisi nan sa ou al regle a nan Venezuela. Sonje tou gen jen jwe ayisyen ki ta byen renmen al jwe nan chanpyona pwofesyonel Venezuela. Si ou jwenn posibilite pou yo al jwe pou kek ekip lot bo a, pa bliye rele yo. Yon lot fwa anko, mwen swete ou reyisi nan sa ou al regle a.