Foot- End: Sony Nordé kontinye ap fè lòbèy

Ekri Pa Gary Eliézer

Atakan nou an, Sony Nordé kontinye ap fè bon bagay nan peyi End lè li fè yon lòt gwo match  ankò jounen samdi sa avèk ekip li nan okazyon 15èm jounen chanpyona I-League la. Malgre Mohun Bagan pèdi (2-3) kont Royal Wahingdoh, Sony Nordé te kreye  sansasyon avèk yon gòl li make nan 78èm minit match la.

Pou yon lòt fwa ankò, Sony Nordé te nan 11 jwè ki te kòmanse match la, e li te fè defans ekip Royal la wè tout koulè lakansyèl avèk aksyon li yo, e konsa, byen bonè, Balwant te fè yon gòl ki te pèmèt Mohun Bagan t’ap mennen (1-0, 5^e)

Apre ke Royal Wahingdoh te fin egalize nan 58e minit, Sony Nordé mete grenn sèl pa li a pou te fè match la (2-1, 78em) men devenn pou Mohun Bagan ki pran 2 gòl nan fen match (88^e, 90^e) e li pèdi (2-3).

Jwè Ayisyen an ki pran tit ‘’ Man of the Match’’ pandan 3 fwa deja nan chanpyona sa, pa sanble ko ap bay legen e menm si ekip li ap pèdi, li toujou fè wè li. Li make 7em gòl li e li se pi bon bitè ekip sa.

N’ap raple malgre defèt sa, ekip Mohun Bagan nan toujou rete nan tèt klasman I-League la ak 28 pwen pou 13 match ke li jwe devan  Royal Wahingdoh, 26 pwen men ki gen 2 match an plis.