Foot- Pòtigal: Zachary Heriveaux pral fè staj nan Sporting Clube

Ekri pa Gary Eliézer

Jwè entènasyonal Ayisyen pi piti pase 23 lanne a k’ap evolye nan New England Revolution Ozetazini, Zachary Heriveaux ap gen pou li rann li nan peyi pòtigal nan jou k’ap vini la pou li al pase yon staj 3 semèn nan sant fòmasyon Sporting Clube.

Sèlman 19 lanne sou tèt li, Zachary Heriveaux ki sòt fè premye sezon li ak gro ekip New England Revolution nan ane sa kote ekip li a te elimine nan premye tou faz rache manyòk (playoffs), pral gen chans pou li al pase staj sa pandan 3 semèn nan sant Sporting Clube ak 2 lòt jenn jwè ki nan menm ekip avèk li.

Sean Okoli et Donnie Smith, se non 2 lòt patizan Ayisyen an k’ap gen pou rive nan peyi Cristiano Ronaldo a dimanch 29 novanm k’ap vini la. Yo tou le 3 ap akonpanye de antrenè ekip New England lan, Jay Heaps et direktè jeneral la, Michael Burns.

Nimewo 16 ekip ayisyèn nan benefisye de staj sa gras ak yon patenarya 2 klèb sa yo pou youn kapab pèmèt lòt amelyore kalite jwè foutbòl yo.