Ekri pa Gary Eliézer
Yo te fè kè nou kontan, yo te fè nou viv yon lòt reyalite pandan semèn 30 sektanm pou rive 9 oktòb ki sòt pase la, seleksyon Ayiti moun anpite yo rive pran 4tryèm plas nan mondyal ki te ap fèt nan peyi Tiki aprè yo te fin pèdi devan Ouzbekistan. Ki kote Grenadye sa yo ki te ap fè gro jefò sa yo sòti? Nan ki vil nan peyi a yo fèt? Ki kote yo ap viv ? Ann wè ansanm…
Yo te 14 jwè pami yo 4 defansè, 5 mitan tèren epi 5 atakan. Kapitèn nan, Manley Osias te gen reskonsabilite pou mennen group sa ki, anpil ladan yo, jèn ti bway nan gwo chanpyona sa ki se Koupdimond kote tout 24 pi gro peyi isi ba te la E avèk anpil foug yo arive fè lonè peyi a. Nou menm jwenn bonis paske Redondo Richard ak Saviola Charles fini pi bon bitè konpetisyon an (9 gòl pou yo chak).
Ann gade ansanm kote potorik gason sa yo sòti anndan peyi a:
John Baby Jean #1 an: Si souvan tout je nou te brake sou moun k ap fè gòl yo, men youn nan gason kanson ki te met seleksyon an nan wotè sa rele, John Baby avèk yon kantite boul li retire ki tap fè wout kan li. Ebyen fenomèn sa se moun Tyòt (Thiote) men li ap viv Sendomeng depi kèk tan. Nèg sa se te yon bout mi dèyè defansè yo.
Emmanuel Ladouceur #12 la: Li te jwe kèk minit nan premye match Ayiti a kont Liberia (4-1) E si li menm menm ki te nan kan moman ti mesye Liberia yo te fè gòl la sou penal. Gadyen sa ki se ranplasan li fèt nan vil Zabriko (Abricot) men lap viv Ozetazini.
Manley Osias # 6 la: Se kapitèn nan. Se li menm ki tap mennen group la sou tèren men deyò tèren tou. Li sòti Fontamara. Li pat janm wont di ki kote li sòti E youn nan gro deklarasyon li aprè yon match se te yon mesaj li te voye pou group bandi zagoloray kap feraye nan Matisan yo kote li te di yo, l ap fè efò ak peyi a E li ta swete lè lap tounen pou l pase alèz pou li al lakay li.
John Antoine #4 la: Li se nèg Okay! John ki ap viv Bonrepo, se te youn nan pi gro reprezantan depatman Sid la nan seleksyon sa menm jan ak Junior Joseph #5 lan, li menm ki se mitan tèren. 2 jwè sa yo se natif natal Okay.
Cité Soleil an gran jan !
Komin Cite Soleil se li ki bay plis jwè nan ekip sa (3 pou n tonbe daplon): John Spinoza #7 la, Mykender Baltazar #8 la ak youn nan gro sipèsta ekip la ki se Saviola Charles #10 la. Ak yo 3 a yo moutre vrèmanvre se pa kote w sòti kap detèmine ki sa wap ye. Yo te jwe avèk kè yo E nou te wè sa byen kòman pèp Cite soleil la te kontan.
Alain Israël #19 la: Pa gen seleksyon san nèg Okap ! Lojik sa kontinye respekte. Jan nou toujou wè l nan tout lòt seleksyon yo, Alain Israel se youn nan 2 nèganm nan ekip sa men li ap viv Ozetazini. Lòt la se Carnot Dorvil #18 la, e li se atakan.
Fritz Gerald Laguerre #16 la: Se nèg Kafou. Guyard Merjuste #2 a: Fèt nan vil Senmak E l ap viv Ozetazini.
Stanley Gustave: #11: Se youn nan atakan ki te kòmanse anpil nan match yo sou ban men chak antre li yo te toujou yon limyè anplis sou tèren an. Li sòti Delma 2.
El Principe Redondo Richard #9 la: Youn nan jwè ki pi popilè nan foutbòl anpite ayisyen an. Se yon jwè ki plis pase yon fenomèn. Sou tèren an li moutre sa, fòs li, teknik li, jan l mennen boul E san nou pa bliye kapasite l pou l fè gòl, tout sa yo fèl se youn nan pi gro jwè foutbòl nou an. Li fini ankò pi bon bitè mondyal sa aprè li te deja fini pi bon bitè edisyon 2018 la. Se timoun Fò Nasyonal E lap viv Ozetazini.
Home
Store
Contact