Grenadye nou yo: Fabrice ”Fafa” Picault

Ekri pa Benson Petit-Clair

Nan objektif pou edew konnen pi byen grenadye nou yo, Haititempo.com kreye yon nouvo ribrik ki se “Grenadye nou yo” kote n’ap prezante w yon jwè ayisyen k’ap evolye swa an Ayiti ou a letranje. Pou kòmanse ak ribrik la, n’ap prezante w Fafa Picault, yon jèn Ayisyen-Ameriken k’ap evolye nan peyi Etazini anndan ekip Fort Lauderdale Strikers la. Fafa Picault ap gen pou reprezante Ayiti pou yon premye fwa nan vi li madi 9 septanm 2014 la nan okazyon match amikal seleksyon nasyonal la ap jwe kont ekip Chilyèn nan, nan lakou Fort Lauderdale.

Non: Fabrice “Fafa” Picault
Dat Nesans: 23 Fevrier 1991 nan lakou New York, USA
Klèb: Fort Lauderdale Strikers
Pozisyon: Atakan

Klèb prefere’l: Arsenal, Milan, AS Roma ak Real Madrid C.F

Jwè prefere’l: Anelka, Ronaldinho, Thierry Henry, Kaká, Zinedine Zidane e Robinho

Idòl li: Pelé
Objektif li: Tounen an Ewop, jwe pou yon gwo ekip pandan yon bon bout tan si li rejwenn chans lan

Fafa komanse jwe foutbòl depi li te tou piti, a 16 zan li te rann li an Itali kote’l te pase nan ekip rezev Cagliari a. Pandan li pa’t jwenn chans pou l te evolye nan Serie A a ak gwo ekip Cagliari a, Fafa t’al pran chans li nan PSG an Frans an 2011. Malgre bon pèfòmans li nan pasaj li nan PSG, sa pa’t arive mache paske PSG te gentan depase limit nonb etranje yo ka pran nan klèb la. Fafa gentan represante USA nan nivo mwen de 20 an. Se pou la premye fwa ke li pral pote koulè peyi d’Ayiti. Selon Fafa, granpapa’ l Max Antoine ak Papa l  se 2 ansyen jwè seleksyon national la. Fafa se meyè bitè ekip Fort Lauderdale Strikers la ak 8 realizasyon sou 15 match pandan sezon an. Fafa ap evolye nan club Strikers la depi 10 Mas 2014. Fafa jwe premye match li pou Strikers nan dat 3 me 2014 an fas FC Edmonton kote li te enskri yon gòl, e li te bay yon pas gòl, match la te fini 3-1 an favè ekip li a. Avan FAFA rejwenn ekip Strikers la, li t’ap evolye nan klèb Tampa Bay Rowdies, li te jwe 19 match pou Tampa e li te ede yo ranpote tit chanpyona NASL la.

Selon Fafa, li pi alèz le li ap evolye kòm yon atakan de sipò, oubyen yon fo nimewo nèf, men li ka jwe sou ni lèl goch, ni lèl dwat, li ka jwe tout kote nan liy atak la sof kòm yon bon avann sant. Vitès ak tenik se de gwo kalite ke li posede, answit li itilize tou 2 pye l egalman. Li renmen kreye chans pou ekip li, e li renmen pase balon an tou bay lot jwè k’ap jwe avèk li. Li konsantre l sou jwe foutbol, e li toujou patisipe nan aktivite legliz li le li pa nan aktivite foutbòl.

Videyo sou Fafa:

Dènye pase men 22 sektanm 2014