Aprè defèt 1-0 Ayiti Sibi devan ekip Chili a madi swa nan Lockhart Stadium nan lakou Fort Lauderdale, FL, Haiti-Tempo te fè yon ti pale ak Pascal Millien ki te jwe pou seleksyon an pandan dezyèm mitan match sa a. Nan entèvyou sila a, Pascal te pataje opinyon l sou rankont lan, sou seleksyon an e li te pwofite pale de nouvo klèb li a tou ki se Fidelis Andria nan peyi Itali.
HT: Pascal, Ki premye enpresyon w sou rankont Ayiti-Chili a? Ki sa seleksyon an tire de match sa a?
PM: Bon pou mwen se te yon gran tès pou nou paske sa fè lontan nou pa jwe epi nou t’ap jwe ak Chili ki se yon gwo ekip, yo te fè yon bèl pakou nan mondyal la. Yo byen plase nan klasman FIFA e yo jwe 12 match an 8 mwa. Se te yon gran match pou nou pa rapò ak fè sa yo.
HT: Se evidan ke ekip la te jwe pi byen nan dezyèm mitan an ke premye mitan an, ki sa ki te koz sa?
PM: Bon antrenè a te monte mwen epi li fèm jwe pi wo paske pwen fò yo se te defensè santral yo ki tap fe jwèt la pou yo. Epi chanjman yo te pote anpil enèji nan gwoup la.
HT: Eske w satisfè de pèfomans ou te bay la?
PM: Mwen pa Janm satisfè men mwen panse mwen ka fe plis toujou. Men anpil kredi pou staf la ak gwoup la.
HT: Pandan ou bay staf la ak group la kredi, eske w panse gen gwo amelyorasyon ki fèt nan ekip la pa rapò a ekip ki te patisipe nan Gold Cup la?
PM: Bon ou ka wè nou te manke kèk jwè pou amelyore gwoup la fas a Chili. Pou mwen nou fè pi bon antrenman pa rapò ak avan. Gwoup Gold Cup la te yon gwoup spesyal pou mwen. Men se yon seleksyon nasyonal tout moun ap travay pou yo fè diferans.
HT: Te gen kèk nouvo jwè nan gwoup sa a, ki saw panse de yo? Èske gen nan yo ki te enpresyone w nan antrenman ou nan nivo de profesyonalis yo?
PM: Bon mwen panse se te yon bon okazyon pou antrenè a pou l prepare pakou seleksyon an. Tout jwè te trè profesyonèl. Yo travay di pandan semèn antrenman an jiska jou match la.
HT: Pou fini eske w ka pale nou de nouvo klèb ou a? 
PM: Aktyèlman mwen an Itali nan yon nouvo klèb ki se Fidelis Andria. Se FC Bari ki gen je sou mwen pou m ka jwe, yo fem al rejwenn Fidelus epi lèm pare pou’m ka rejwenn yo. Mwen vrèman kontan nan moman sa a. Bondye vrèman beni mwen.
PM: Pascal, yon dènye mo pou fanatik yo?
PM: Mwen vle di yo mèsi poutèt yo toujou sipòte mwen kit nan nivo seleksyon kit nan nivo klèb. Mwen swete yo rete positif epi pi gwo rezilta ap vini. E mwen renmen yo. Spesyalman pèp ayisyen mwen an. L’union fait la force!!!
Entèvyou reyalize pa Benson Petit-Clair pou Haititempo.com
Home
Store
Contact