Ekri pa Benson Petit-Clair
Edisyon 2015 chanpyona MLS la (Major League Soccer) demare ak 20 ekip, san gwo sipriz, men anpil sansasyon. Si gwo vedèt tankou Kaka ak David Villa te jwe premye match yo nan lig la, jwè Ayisyen nou yo ki nan lig la pa’t menm arive jwenn konvokasyon yo.
Premye match pou ane a te opoze ekip chanpyon an tit la, LA Galaxy ak Chicago Fire nan vil Los Angeles. Premye mitan match la te fini san twò gwo aksyon, men Galaxy te arive pase yon vitès siperyè nan dezyèm mitan an kote yo arive skore 2 gol sou defans Chicago a ki te parèt kodyòm. Jose Villarreal ak Robbie Keane se te 2 atizan gol LA yo.
Nan yon rankont ant 2 ekip Kandadyen, Ayisyen-Ameriken Jozy Altidore skore 2 fwa nan premye match li ak FC Toronto. Altidore, ki kite ekip Sunderland lan nan peyi Angletè, deja mete anprent li nan MLS la. Gras ak 2 reyalizasyon li yo, Toronto bat Vancouver Whitecaps 3-1 nan yon match ki te gen anpil tansyon.
Yon lòt kote, FC Dallas arive bat San Jose Earthquakes 1-0 gras ak yon gòl de Blaz Perez nan fen match la. Se te menm senaryo a nan Washington DC, kote DC United rache yon viktwa 1-0 sou Montreal gras Jairo Arrieta ki te make nan fen rankont lan. Nan yon lot rankont ki fini 1-0, Houston Dynamo te kontante yo ak yon gol yo te resevwa nan men Giles Barnes nan 66èm minit pou arive bat Columbus Crew.
Nan yon match ant 2 nouvo ekip nan lig MLS la, Orlando City dekwoche yon pwen gras ak kapitèn ekip la, Kaka, ki skore swit ak yon koufran nan fen match la. Mix Diskerud te make premye gòl nan rankont lan pou ekip New York FC a, ki te pratikman domine pa Orlando pandan tout rankont lan. 62,358 spektatè te prezan pou aplodi Kaka ak rès ekip la.
Nan zòn Seattle, ekip lokal la, Sounders, bat New England Revolution 3-0 gras a 2 gòl de Clint Dempsey, ansyen jwè New England. Dempsey te louvri skò a nan 25èm minit rankont lan, apre sa, Obafemi Martins te double avantaj la pou Seattle 4 minit avan poz la epi Dempsey tapral make dezyèm gol li nan 67èm minit rankont lan. New England pa’t gen sèvis Lee Nguyen ak Jermaine Jones, yo tou 2 te absan akoz blesi.
Sporting Kansas City ak New York Red Bulls fè match nil nan vil Kansas. Ike Opara te louvri skò a pou Sporting nan kòmansman dezyèm mitan an, 4 minit aprè, Sam Llyod egalize pou vizitè yo gras ak yon bèl efò endividyèl. Konpratryiyòt nou Soni Mustivar, ki te siyen ak Sporting nan mwa pase a, pa’t youn pami 18 jwè ke entrenè Peter Vermes te konvoke pou match sa a.
Pou premye jounen an, te gen 2 rankont ki te tèmine sou skò vièj: Portland Timbers ak Real Salt Lake, Philadelphia Union ak Colorado Rapids.
[soccer-info id=’512′ type=’fixtures’ title=’Pwogramasyon’ /]
Home
Store
Contact