Youn nan manb komite ekzekitif FIFA a Theo Zwanziger pataje opinyon l sou dewoulman mondyal 2022 a kote li deklare ke li pa panse ke mondyal la ap arive fèt nan peyi Qatar jan sa ta prevwa. Nan deklarasyon li, manb komite ekzekitif la soulinye pwoblèm chalè ekstrèm nan peyi sila a ap anpeche mondyal la fèt jan sa te planifye.
Yon lòt kote, komite peyi Qatar mete an plas pou òganize evenman sila a deklare ke li posib pou mondyal ete 2022 a dewoule gras ak avans teknolojik ke yo konte itilize sou teren yo pou kontwole tanperati a.
Zwangizer ki se ansyen prezidan federasyon foutbol alman an, sigjere ke aksyon legal ke moun ki ka afekte nan chalè a ka pran kont FIFA ka fòse dirijan yo pou yo òganize mondyal 2022 a nan yon lòt peyi. Zwangizer kontinye pou’l di “Yo ka refwadi teren yo men yon mondyal pa fèt sèlman nan stad yo. Fanatik ap sòti nan tout peyi pou vin asiste e vwayaje nan chalè ekstrèm sa a ka gen gwo enpak sou lavi moun yo, sa ka menm deklanche yon envestigasyon pa pwosekitè nenpòt peyi ki konsène.”
FIFA pa’t pran lontan pou l te kalifye deklarasyon Zwangizer yo kom opinyon pèsonèl ki pa nesesèman reprezante pozisyon FIFA sou dosye sa a. Epi, yo te evite fe plis kòmantè sou kesyon an.
Èske mondyal 2022 a ap arive fèt nan peyi Qatar? Yon dosye n’ap swiv de prè!
Benson Petit-Clair/Haititempo.com
Home
Store
Contact