Ekri pa Benson Petit-Clair
Pou tiraj osò Copa America a kap fèt dimanch aprè midi nan vil New York, nou deja konnen Ayiti nan menm chapo ak Panama, Jamayik ak Kosta Rika, sa vle di nou pap nan menm gwoup ak peyi sa yo.
Nou konnen gen 4 tèt de seri: USA, Brezil, Meksik ak Ajantin, sa vle di n’ap nan menm poul ak youn nan 4 ekip sa yo.
Kounye a rete 8 peyi nan zòn Amsid la, 2 pami yo pral konplete gwoup Ayiti a: Chili, Kolonbi, Ekwatè, Irigwey, Bolivi, Paragwey, Perou ak Venezuela.
Tempo anvizaje yon senaryo kote Ayiti ap tonbe nan gwoup A ansanm avèk USA, Ekwatè ak Bolivi.
Poukisa gwoup USA a?
Nan 4 tèt de seri yo, USA se ekip ki pi fèb nan moman an. Grenadye yo te negosye yon bon match kont USA pandan Gold Cup la malgre Ameriken yo te bat nou 1-0. Match la te gen anpil tansyon e Grenadye yo te jwenn anpil bèl okazyon tankou koufrankoufran Mechack Jérôme la, kout tèt Donald Guerrier apre sant Kim Jaggy sou lèl goch la, san bliye Duckens Nazon te rive fas a fas ak Brad Guzan, gadyen an, men li pat arive enskri gòl la. Aprè match la Klinsmann te voye anpil konpliman pou Marc Collat pou fason Grenadye yo te jwe devan Ameriken yo. Byenke avan match la, yon jounalis Tempo ki te prezan nan stad la te mande Collat opinion li sou ekip amerikèn nan, Collat pat twò gen konfyans nan repons paske li te deklare USA fèk sot bat Almay lakay li (2-1) nan amikal epi bat Peyi-Ba (4-3), li pa ko wè kòman li pral bat match sa a. Grenadye yo te ka fè pou piti yon match nil devan USA menm jan yo te fè sa nan menm stad la nan Gold Cup 2009 la.
Menm ekip USA a ta pral pèdi nan demi final Gold Cup la devan Jamayik, epi tou dènyeman ekip Trinidad la ke Ayiti te bat pou jwenn biyè kalifikasyon pou copa a te fè match nil (0-0) kont USA. Dènye pèfòmans USA yo nan kad match konpetitif ke yo jwe yo konfime bès de rejim seleksyon Jurgen Klinsmann nan ki pèdi devan Jamayik, Panama ak Meksik. Sèl bon pèfòmans USA fè nan 5 dènye match ki pat amikal yo se te yon viktwa 6-1 devan Sen Vensan. Sou plan match amikal USA fè 2 viktwa devan 2 ekip modès pandan ane sa a: Canada ak Island men sepandan Brezil te imilye Ameriken yo 4-1 pandan yon amikal an septanm 2015, Costa Rica te bat USA 1-0 3 jou aprè Meksiken yo te fin kalifye pou koup konfederasyon sou Ameriken yo.
Se sèten USA patap tèt de seri si konpetisyon an tap fèt nan yon lòt peyi. Dayè, Chili, Kolonbi, Iwigwey ak Ekwatè klase pami Top 13 nan dènye klasman FIFA pandan USA twouve li nan 32èm pozisyon. San bliye Chili se chanpyon an tit.
Si pwonostik la tonbe jan nou panse a, Ekwatè ap pi gwo tès pou Grenadye yo. Se vre Ekwatoryen yo pa gen bèl palmarès nan Copa America, men Ekwatè se ekip ki gen pi bon pakou nan eliminatwa mondyal 2018 la pou zòn CONMEBOL la. Ekwatè jwe 4 match nan eliminatwa a, yo bat tou le 4, e youn nan match yo se te yon viktwa 2-0 lakay Ajantin.
Pou fini, Bolivi tap parèt kòm viktwa ki pi garanti pou Grenadye yo nan gwoup sa a, donk si Patrice Neveu arive bat Bolivi e jere USA nan yon gwoup parèy, se Ayiti ak Ekwatè k’ap pase nan gwoup sa a ke nou swete jwenn Grenadye yo apre tiraj la.
Randevou pou dimanch 21 fevriye 2016 a 8:00 pm pou tiraj la. Tempo ap prezan!
Home
Store
Contact