Foot- Sante : Gabriel Michel ‘’Tigana’’ malad grav depi 2 mwa

Ekri pa Gary Eliézer

Avanyè jedi ki sot pase la te gen yon gwo reyinyon ki te fèt nan Delma 3 nan lakou kat (4) zanmi restoran pou yo te ka mete kanpe yon komite ki pral kapab pran an chaj lasante Gabriel Michel ‘’Tigana’’ ki ap soufri ak yon maladi depi 2 mwa.

Komite sa ki gen ladann kèk ansyen jwè foutbòl ki te konn jwe ansanm ak Tigana nan seleksyon an tankou : Jean Roland Dartiguenave ak aktyèl sekretè jeneral federasyon Ayisyèn foutbòl la Carlo Marcelin epi 2 manb nan fanmi Gabriel, ap òganize yon gwo gala foutbòl jou ki ap samdi 27 desanm ki ap vini la nan stad Sylvio Cator kote ap gen 2 match nan lide pou yo pote kontribisyon pa yo nan tèm lajan ak kokenn chenn gwo jwè boul sa.

Selon enfomasyon nou genyen, ansyen jwè seleksyon nasyonal la nan lanne 1995 jiska 2003, ta sanble ap soufri de yon maladi ki pa gen tròp eksplikasyon, e pwoblèm sa ta rann vant li anfle tankou yon barik epi 2 pye li yo ta paralize tou, sa ki rann, se sou beki  oubyen chèz woulant li ye depi dènye tan sa yo.

Ansyen jwè foutbòl la ki te ap antrene AS Dessalines nan dezyèm divizyon, te fè anpil demach selon sa li di nan yon chita pale ak Radyo Trans Inter, bò kote prezidan klèb sa ki se depite Garcia Delva pou li te kapab al chache swen, men anyen pat tonbe, li te fè kèk tchèk tou pa bò kote prezidan an apre Aigle Noir ki se tou direktè EDH (yon lòt ekip li ap antrene) Ingenieur Civil, se te toujou san repons. Sèl espwa Tigana pou kounya ta sanble se sou komite sa ki gen nan tèt li Etienne Beauvoir.

N’ap di, se seleksyon pi piti pase 20 tan ak lòt ti piti 17 tan yo k’ap jwe ansanm le 27 desanm nan pou Tigana, men avan match sa, ansyen jwè ki te konn jwe avè’l yo ap kontre kare tou ak atis yo.