Foot- seleksyon pi piti 23 zan: 6 jwè tounen nan klèb yo

Ekri pa Gary Eliézer epi Benson Petit-Clair

Antrenè an apre seleksyon pi piti pase 23 lanne a, Jerome Velfert, voye ale jounen dimanch sa 6 jwè nan ekip la, ki nan konsantrasyon depi plis ke yon semèn nan sant Kwadèboukè pou yo ka al patisipe nan premye faz eliminatwa JO2016 yo. Jwè sa yo ki sòti nan Don Bosco epi Aigle Noir, oblije  tounen nan klèb yo pou yo ka al jwe dezyèm tou  chanpyona nasyonal D1 an (play-offs) k’ap kòmanse demen lendi a.

Vrèmanvre, jounen dimanch lan 6 jwè: Nerlin Saint-Vil, Hilaire Orilus, Benderlin Beaubrun, Valendi Luis Odelus, tout k’ap jwe nan Aigle Noir, epi Gregory Marcelo ak Benchy Estama k’ap jwe nan Don Bosco, tounen al jwenn klèb yo pandan ke yo enpòtan anpil pou seleksyon an.

Se te kesyon tout moun te ap poze pou yo te wè koman sa ta pral pase, ant gwo seleksyon an ki ap kite peyi a semenn sa pou yon staj nan Akademy IMG (Etazini), seleksyon pi piti pase 23 lanne a, ki ap komanse jwe eliminatwa JO2016 a pati 24 jen epi yon faz dechoukaj federasyon an mete nan chanpyona premye divizyon ane sa k’ap komanse nan menm semenn nan. Nouvèl la tonbe, tout jwè ki konsène pa play-offs yo retounen nan klèb yo.

A kèlke jou pou 25 nan 35 jwè yo te rele nan gwo seleksyon an pati al nan staj pou prepare Gold Cup la, ki chans ki genyen pou jwè lokal ki nan ekip sa jwenn plas yo, si y’ap voye ale tout sa ki konsene pa faz dechoukaj chanpyona nasyonal la?